ស្របពេលប្រទេសជាតិ មានសុខសន្តិភាព ការចូលរួមចំណែកលើកស្ទួយវិស័យកីឡា កាន់តែមានការរីកចម្រើន

10-02-2019 5:40pm

កំពង់ចាម​:​ លោក គួច ចំរើន អភិបាល​នៃ​គណៈ​អភិបាល​ខេត្តកំពង់ចាម​ អមដំណើរ​ដោយ​មន្ត្រី​ពាក់ព័ន្ធ​​ បានអញ្ជើញចូលរួម​​លើក​ទឹកចិត្ត​ និង​ទស្សនា​ ការប្រកួតពានរង្វាន់បាល់ទាត់យុវជន​ ក្រោម​អាយុ​១៥ឆ្នាំ ១៧ឆ្នាំ​ ប្រកួតលើកទី៦ រវាងខេត្តកំពង់ចាម និងខេត្តត្បូងឃ្មុំ ដែល​ពិធី​នេះ​បាន​ធ្វើឡើង​នាព្រឹក​ថ្ងៃ​ទី​១០​ ខែកុម្ភៈ​ ឆ្នាំ​២០១៩​ នៅ​កីឡដ្ឋាន​ខេត្តកំពង់ចាម​ ។

លោក លី ម៉េងសាន ប្រធានមន្ទីរអប់រំយុវជន និងកីឡា​ខេត្តកំពង់ចាម​ បាន​ឲ្យ​ដឹង​ថា​ ការ​ប្រកួត​នេះ​ គឺ​គណៈកម្មការ​បាន​រៀបចំ​ឡើង​ ​មាន​ចំនួន​​២០ការ​ប្រកួត​ ដោយ​​មានក្រុម​កីឡា​ ​សរុប​ចំនួន៦ក្រុម ក្នុង​នោះ​ក្រុមកីឡាករមាន៤ក្រុម និងកីឡាការីនីមានចំនួន២ក្រុម ដែលមាន​ចំនួន​៣៩៤នាក់​ និង​គ្រូបង្វឹក​១២នាក់​ ក្នុង​គោលបំណង​ចូលរួម​ដណ្ដើម​ពាន​រង្វាន់​ សហព័ន្ធ​កីឡា​បាល់ទាត់​កម្ពុជា​ នៅ​រាជធានីភ្នំពេញ​ និង​ជ្រើសរើស​យក​កីឡាករ​ដែល​មាន​ទេពកោសល្យ​ ធ្វើ​ការ​បណ្តុះបណ្តាល​បន្ថែម​ ដើម្បី​ត្រៀម​ប្រកួត​ដណ្តើម​ពាន​រង្វាន់​ស៊ីហ្គេម​ឆ្នាំ​២០២៣​ ដែល​កម្ពុជា​​ធ្វើ​ជា​ម្ចាស់​ផ្ទះ​ផង​ដែរ​ ។

ឆ្លៀត​ក្នុង​ឱកាស​នោះ​ដែរ​ លោក​ គួច​ ចំរើន​ អភិបាលខេត្ត​កំពង់ចាម​ បានឩបត្ថម្ភជូន ដល់ក្រុមកីឡាករ​ កីឡាការីនីទាំង៦ក្រុម ដោយក្នុង១ក្រុម ទទួលបានថវិកា១លានរៀល និងគណៈកម្មការរៀបចំការប្រកួត​ទទួល​បាន​ថវិកា ១លានរៀលផងដែរ ។

គួរ​រំលឹក​​ផង​ដែរថា​ កន្លង​មក​លោក អភិបាលខេត្ត តែងតែ​ជំរុញ​ឲ្យគ្រប់មន្ទីរអង្គភាព​ពាក់ព័ន្ធ​ជុំវិញខេត្ត​ គាំទ្រ​ឧបត្តម្ភ​ផ្នែកកីឡា​នីមួយៗ​ ឲ្យកាន់តែ​មាន​ការ​រីកចម្រើន​ឡើង​ និងជាពិសេសដើម្បីត្រៀមខ្លួនចូល​រួម​​ប្រកួតកីឡាសីហ្គេមឆ្នាំ២០២៣​ ដែលកម្ពុជាធ្វើជាម្ចាស់ផ្ទះ​ ដែល​ជា​ការ​ចូលរួម​ចំណែកលើកស្ទួយវិស័យកីឡា​ ឲ្យកាន់តែ​មាន​ការ​រីកចម្រើនជាលំដាប់​ ​ស្របពេលដែលប្រទេសជាតិមានសុខសន្តិភាព​ ៕